Frétt

Sveitarfélögum sem bjóða ókeypis námsgögn fjölgar

02. ágúst 2017 - 12:01:44

ER minniBarnaheill – Save the Children á Íslandi fagna þeim fjölda sveitarfélaga sem hafa ákveðið að námsgögn verði grunnskólabörnum að kostnaðarlausu. Samtökin hafa frá árinu 2015 staðið fyrir vitundarvakningu og áskorunum til yfirvalda um að virða réttindi barna til gjaldfrjálsrar grunnskólamenntunar eins og Barnasáttmálinn kveður á um. Í gjaldtöku felst einnig mismunun sem börn eiga rétt á vernd gegn.

Í vor var mennta- og menningarmálaráðherra afhentur undirskriftalisti með á sjötta þúsund undirskriftum þar sem skorað var á yfirvöld að breyta grunnskólalögum og afnema gjaldtöku fyrir námsgögn.

Nú hafa 26 sveitarfélög stigið skrefið til fulls og ákveðið að námsgögn verði ókeypis. Þetta eru sveitarfélögin Akranes, Akureyri, Blönduós, Bolungarvík, Borgarbyggð, Borgarfjarðarhreppur, Dalvík, Fjarðarbyggð, Garðabær, Garður, Grenivík (Grýtubakkahreppur), Grundarfjörður, Hafnarfjörður, Hornafjörður, Húnavatnshreppur, Hveragerði, Ísafjörður, Mosfellsbær, Mýrdalshreppur, Reykjanesbær, Sandgerði, Skagafjörður, Skeiða- og Gnúpverjahreppur, Snæfellsbær, Súðavíkurhreppur og Svalbarðsstrandahreppur.          

„Við fögnum þessum fjölda seitarfélaga og óskum þeim innilega til hamingju með þetta mikilvæga réttlætismál. Við lítum svo á að grunnskólinn eigi að vera hornsteinn jöfnuðar og hér er stigið mikilvægt skref í þá átt,” segir Erna Reynisdóttir, framkvæmdastjóri Barnaheilla; „Um leið hvetjum við þau sveitarfélög sem ekki hafa stigið þetta réttlætisskref að gera svo hið fyrsta og tryggja börnum þannig rétt sinn. Við höfum útbúið landakort sem sýnir þau sveitarfélög sem hafa þegar gert námsgögn ókeypis og það má gjarnan koma upplýsingum um ný sveitarfélög til okkar svo við getum bætt þeim inn á kortið.”

Þess má geta að nýverið ákvað bæjarráð Kópavogs að kanna kostnað við niðurgreiðslu námsgagna.

Hægt er að senda upplýsingar um sveitarfélög sem ekki eru á kortinu á netfangið barnaheill@barnaheill.is, eða í gegnum Facebook síðu samtakanna.

 Gjaldfrjals grunnskoli 11 agust

Fréttin er uppfærð eftir því sem upplýsingar berast um sveitarfélög sem hafa gert námsgögn gjaldfrjáls.

 

Tengdar fréttir:

28.5.2017 Þakkir á Degi barnsins

22.3.2017 Á sjötta þúsund undirskrifta söfnuðust

18.3.2017 Skrifum undir áskorun til stjórnvalda: Burt með innkaupalista grunnskólanna

15.3.2017 Krakkarnir í hverfinu eru alls konar en eiga öll rétt á gjaldfrjálsri grunnmenntun

13.3.2017 Börn upplifa mismunun vegna námsgagna - Undirskriftasöfnun

10.8.2016 Afnemum gjaldtöku fyrir námsgögn - undirskriftasöfnun

27.5.2016 Áskorun um gjaldfrjálsan grunnskóla

13.5.2016 Innkaupalistar grunnskólanna samræmast ekki lögum

20.8.2015 Áskorun um gjaldfrjálsan grunnskóla