Ríflega helmingur allra vannærðra barna í heiminum býr í þeim löndum þar sem rannsóknin var gerð. Nær þriðjungur foreldra í rannsókninni segir að börn þeirra kvarti yfir því að fá ekki nóg að borða og eitt foreldri af hverjum sex hafði beðið barn sitt um að hætta í skóla og fara þess í stað að vinna til að hjálpa til við að greiða fyrir mat fjölskyldunnar.

Rannsóknin veitir innsýn í erfitt líf fjölskyldna í þessum löndum sem glíma við hátt hlutfall vannærðra barna. Í nýrri skýrslu Barnaheilla – Save the Children,  A Life Free from Hunger: Tackling Child Malnutrion (Líf án hungurs: Tekist á við vannæringu barna), kemur fram að hækkandi matvælaverð og vannæring geti staðið í vegi fyrir því að frekari árangur náist í baráttunni við barnadauða í heiminum.

Jafnvel áður en matvælaverð hækkaði, bjuggu mörg af fátækustu börnum heims þegar við mjög rýran kost þar sem uppistaðan er hvít hrísgrjón, maís eða mjöl úr kassavarót, sem hefur mjög lítið næringargildi. Barnaheill – Save the Children vara við því að ef ekki verði gripið til samstilltra aðgerða, gæti nær hálfur milljarður barna liðið fyrir líkamlegan og andlegan vanþroska (e. stunting) á næstu 15 árum og líf þeirra verði markað af vannæringu.

„Ímyndaðu þér að þú værir foreldri sem gætir ekki gefið börnum þínum mat sem hjálpar þeim að vaxa og dafna.“ segir Jasmine Whitbread, framkvæmdastjóri Barnaheilla – Save the Children. „ Á liðnum árum, hefur heiminum tekist að draga með stórfelldum hætti úr barnadauða, sem hefur farið úr 12 milljónum í 7,6 milljónir. Ef við missum skriðþungann núna, hefur okkur mistekist að takast á við vannæringu í heiminum. Vannæring getur skaðað börn fyrir lífstíð, veikt heila þeirra og líkama. En með samræmdu átaki, getum við boðið upp á lausnir sem binda enda á þetta hneyksli.“

Þó vannæring sé undirliggjandi ástæða þriðjungs alls barnadauða í heiminum, hefur henni ekki verið veitt sama athygli eða fengið jafn mikið fjármagn og aðrar orsakir barnadauða, s.s. alnæmi/eyðni eða malaría. Þetta þýðir að á meðan að tekist hefur að draga úr barnadauða af völdum malaríu um þriðjung frá árinu 2000, hafa tölur um vannæringu barna í Afríku einungis lækkað um innan við 0,3%.

Þetta ástand er heiminum dýrt, bæði út frá mannúðar- og fjárhagslegum sjónarmiðum. Barn, sem hefur verið þrálátlega vannært, getur haft 15 punktum lægri  greindarvísitölu en barn sem fengið hefur almennilega næringu. Barnaheill – Save the Children telur kostnað hins alþjóðlega hagkerfis vegna vannæringar barna, einvörðungu á árinu 2010, vera nær 121 milljarðar Bandaríkjadala.

Samtökin segja að með því að setja á fót áætlun með grunnaðgerðum, eins og að bjóða styrkjandi mat með nauðsynlegum steinefnum og vítamínum, hvetja til þess að mæður hafi börn sín einvörðungu á brjósti fyrstu sex mánuðina og stýra betur fjármagni svo það nái til fátækustu fjölskyldanna, væri hægt að snúa við blaðinu, draga úr vannæringu og varnarleysi þeirra fátækustu gagnvart sveiflum á matvælaverði.

Barnaheill – Save the Children hvetja þjóðarleiðtoga til að grípa til nokkurra einfaldra aðgerða til að takast á við vannæringu með því að:

• Auka sýnileika vandans með því að setja sér markmið til að draga úr vanþroska barna.
• Auka fjárframlög til beinna næringaraðgerða, s.s. brjóstagjafar og efnabætingu matvæla sem geta bjargað milljónum lífa.
• Fjárfesta í félagslegum aðgerðum sem virka til jöfnuðar og ná til þeirra fjölskyldna sem berskjaldaðastar eru og styðja minni bændur til að framleiða næringarríkari afurðir.
• Nýta fundi G8 og G20 ríkjanna til að örva pólitíska forystu í málefnum hungurs og koma á raunhæfri aðgerðaáætlun í baráttunni við vannæringu.
  
  

„Á hverri klukkustund dagsins, deyja 300 börn af völdum vannæringar, oft einfaldlega af því að þau hafa ekki aðgang að grunnfæði sem er næringarríkt og við lítum á sem sjálfsagðan hlut í ríkari löndum,“ segir Jasmine. „Með því að bregðast við hungri og vannæringu, geta þjóðarleiðtogar breytt þessum veruleika fyrir milljónir barna í heiminum.“

Til upplýsingar:

Rannsókn Barnaheilla – Save the Children sýnir að á Indlandi, einu mest vaxandi hagkerfi heimsins þar sem helmingur allra barna þroskast ekki eðlilega, segir meira en fjórðungur allra foreldra sem rætt var við, að börn þeirra séu stundum eða oft án matar; í Nígeríu hafði nær þriðjungur foreldra tekið börn sín úr skóla svo þau gætu unnið fyrir mat; í Bangladesh sögðu 87% að matvælaverð hefði verið aðal áhyggjuefni þeirra árið 2010.

Rannsóknin var framkvæmd af Globescan í desember 2011 og janúar 2012 í Pakistan, Bangladesh, Perú, Nigeríu og á Indlandi. Í þessum löndum býr helmingur þeirra 170 milljóna barna í heiminum sem þroskast ekki eðlilega. Hlutfall vanþroska barna í þessum löndum er: Pakistan 42% (10,1 milljón barna), Bangladesh 43% (7 milljónir barna), Indland 48% (60,5 milljónir barna), Nigería 43% (10,9 milljónir barna) og Perú 24% (712.560 börn).

Tekið var viðtal við 1000 einstaklinga yfir 18 ára aldri, sem valdir voru af handahófi, í hverju landi, bæði í þéttbýli og dreifðari byggðum. Tekið var tillit til tekna og kynferðis. Niðurstöður má túlka fyrir landið í heild. Alls staðar nema í Bangladesh, voru viðtölin tekin auglitis til auglitis. Þar í landi er farsímatæknin nýtt af 80-90% fullorðinna og viðtölin fóru því fram með símtölum af handahófi.