Starfsfólk Barnaheilla - Save the Children á Íslandi óskar börnum og fullorðnum um land allt, heillavinum, félagsmönnum og samstarfsaðilum gleðilegra jóla og farsældar á komandi ári. Við þökkum ómetanlegan stuðning og gott samstarf á árinu sem er að líða.

Skrifstofa samtakanna verður lokuð frá klukkan 12 á hádegi föstudaginn 21. desember. Við opnum aftur miðvikudaginn 2. janúar klukkan 10.

Epli.is styður Barnaheill - Save the Children á Íslandi með 1.000 krónum af hverjum seldum iPad í desember. Epli er hlekkur í Heillakeðju barnanna sem er afar mikilvæg fjáröflunarleið fyrir samtökin.

Í hverjum mánuði er valið þema út frá Barnasáttmála Sameinuðu þjóðanna. Þema desembermánaðar er út frá 13. grein sem fjallar um tjáningarfrelsi og 19. greininni um vernd barna gegn ofbeldi. og er þá sérstaklega fjallað um ofbeldi á neti.

,,Á hverju ári leiðast 1-2 milljónir barna í heiminum út í vændi vegna fátæktar og erfiðra aðstæðna. Þau eru í raun beitt kynferðisofbeldi gegn gjaldi, til dæmis af ferðamönnum." Þetta skrifar Margrét Júlía Rafnsdóttir í Fréttablaðinu í dag. Margrét telur mikilvægt að aðilar í ferðaþjónustu á Íslandi sameinist um að innleiða siðareglur um vernd barna gegn kynferðislegu ofbeldi af hálfu ferðamanna.

SAMAN-hópurinn hefur komið á fót jóladagatali sem stuðlar að samveru fjölskyldunnar. Um er að ræða herferð þar sem áhugaverðar tillögur eru settar fram að notalegum samverustundum fyrir fjölskylduna.

Eitt helsta hlutverk hópsins er að styrkja og styðja foreldra í uippeldishlutverkinu og beina athygli að ábyrgð þeirra sem uppalendur. Foreldrar eru hvattir til jákvæðra samskipta og vinna gegn áhættuhegðun barna og unglina með því að styðja við heilbrigðan lífsstíl og styrkja sjálfsmynd þeirra.

Heimili og skóli – landssamtök foreldra, Rauði krossinn, Ríkislögreglustjóri og Barnaheill – Save the Children á Íslandi gerðu í dag tímamótasamning við þrjú ráðuneyti mennta- og menningarmála-, innanríkis- og velferðarmála um stuðning við SAFT verkefnið til ársloka 2014.

Samningurinn var undirritaður við athöfn í Langholtsskóla í morgun og snýr að rekstri SAFT verkefnisins á Íslandi.