Vinatta Logo  Tilkynna Logo

Kambódía

Kambódía

Barnaheill – Save the Children á Íslandi lögðu samtals rúmar 12 milljónir króna í menntunarverkefni í stríðshrjáðu Stoeung Trong-héraði í Kampong Cham sýslu í Kambódíu á árunum 2007-2010. Fyrir fjárframlög Barnaheilla – Save the Children á Íslandi voru byggðir þrír skólar með allri nauðsynlegri aðstöðu. Kennarar fengu þjálfun og haldnir voru fundir með foreldrum um mikilvægi menntunar. Vinnuhópum, barna- og ungmennaráðum  og skólanefndum var komið á fót til að efla þátttöku barna og foreldra í skólastarfi og til að hvetja börn, sem hafa verið án skólagöngu, til þess að fara í skóla. Nokkrir skólar fengu kennsluefni og sett voru  upp bókasöfn í nokkrum skólum.

Kennarar, foreldrar og börn fengu kennslu um varnir gegn ýmsum sjúkdómum og foreldrar fengu aðstoð við að koma upp foreldrareknu leikskólastarfi. Einnig var komið upp menntamiðstöðvum til að veita ungu fólki, sem ekki hefur lokið grunnskóla, menntun.  Barnaheill – Save the Children á Íslandi áttu þannig þátt í að veita meira en 900 börnum á grunnskólaaldri aðgang að góðu skólahúsnæði og meira en 300 börnum á leikskólaaldri, aðgang að leikskólastarfi. Alls hafa um 23 þúsund börn í Kambódíu notið góðs af uppbyggingarstarfi Barnaheilla – Save the Children á Íslandi á einn eða annan hátt.

Miklu máli skiptir að virkja allt samfélagið til að verkefnin verði sjálfbær og Barnaheill – Save the Children í Kambódíu vinna náið með fræðsluyfirvöldum þar í landi. Ólæsi er mikið í landinu og enn eru þúsundir barna án skólagöngu og bæta þarf menntun þúsunda barna til viðbótar. Menntun hjálpar börnum að vernda sig gegn sjúkdómum og ofbeldi og að takast á við erfiða reynslu auk þess sem hún veitir þeim styrk, færni og betra líf.

Barnaheill – Save the Children á Íslandi stefna að því að styðja áfram uppbyggingarstarf í Kambódíu ef fjármagn fæst til verkefnisins.

Tengdar fréttir:

KAMBÓDÍA