Vinatta Logo  Tilkynna Logo

Save the Children International

Matur fyrir flóttamenn í SýrlandiSave the Children eru stærstu alþjóðlegu frjálsu félagasamtök sem starfa í þágu barna í heiminum. Á vegum alþjóðasamtakanna eru 30 landsfélög sem vinna að réttindum og velferð barna í 120 löndum og hafa barnasáttmála Sameinuðu þjóðanna að leiðarljósi. 

Neyðaraðstoð er ein af meginstoðum alþjóðlegs starfs Barnaheilla - Save the Children. Alþjóðasamtökin eru með áratuga reynslu í hjálparstarfi á hamfarasvæðum. Þar sem samtökin vinna að verkefnum í um 120 löndum, eru þau oftar en ekki til staðar á svæðum þar sem hamfarir verða og geta því brugðist fljótt við neyð í viðkomandi löndum.

Í hjálparstarfinu gæta Barnaheill – Save the Children sérstaklega að velferð barna en börn þurfa sérstaka vernd á tímum hamfara. Samtökin leggja áherslu á að grunnmenntun barna verði hluti af neyðaraðstoð, ekki síst á átakasvæðum þar sem neyðarástand hefur ríkt í langan tíma.

Barnaheill – Save the Children á Íslandi vinna náið með Save the Children um mótun stefnu og starfshátta. Starfsmenn samtakanna eru í miklum samskiptum við starfsmenn alþjóðaskrifstofunnar, sem staðsett er í London.  

Á myndinni má sjá starfsfólk Barnaheilla í Sýrlandi afhenda flóttamönnum mat.  Mynd/Héðinn Halldórsson - Save the Children