Þetta er líkami minn og slysavarnir

Einn liður í fræðslu- og forvarnarverkefni samtakanna um vernd barna gegn kynferðislegu ofbeldi á börnum er útgáfa bókarinnar ,,Þetta er líkaminn minn”. Bókin er skrifuð til að aðstoða fullorðna og börn á leikskólaaldri við að ræða saman um ofbeldi á opinn og óþvingaðan hátt. Samtökin eru í samstarfi við heilsugæslustöðvar um dreifingu á bókinni og á árinu 2007 fóru tæplega 3.000 bækur til barna víða um land.

Barnaheill - Save the Children á Íslandi gefa einnig út plakat þar sem vakin er athygli á slysahættum í umhverfi barna. Heilsugæslustöðvar sjá um dreifingu á plakatinu.

Fræðsluefni er hægt að panta á skrifstofu samtakanna í síma 553 5900 eða með því að senda tölvupóst á barnaheill@barnaheill.is.

Barnasáttmáli Sameinuðu þjóðanna

Barnaheill - Save the Children á Íslandi, umboðsmaður barna og Barnahjálp S.þ. (UNICEF) á Íslandi, í samstarfi við Námsgagnastofnun, hafa unnið námsvef og gefið út veggspjöld og bæklinga með efni barnasáttmálans. 

Um er að ræða gagnvirkan námsvef sem ætlaður er börnum frá 5-14 ára. Vefurinn er hugsaður til notkunar í skólum, en einnig geta börn nýtt hann utan skóla. Á vefnum læra börn um þau réttindi sem kveðið er á um í barnasáttmálanum.

Á veggspjaldi og í bæklingi, sem ætluð eru 6-12 ára börnum, er efni barnasáttmálans sett fram á einföldu máli. Einnig hefur verið gefið út veggspjald sem hentar eldri börnum. Efnið er ætlað til notkunar í grunnskólum en einnig á öðrum vettvangi. Þórarinn Leifsson myndskreytti veggspjöldin og Námsgagnastofnun sá um ritstjórn og hönnun.

Hægt er að nálgast veggspjöld og bæklinga með efni barnasáttmálans á pdf-formi á vefnum barnasattmali.is. Einnig er hægt að panta veggspjöld og bæklinga á skrifstofu Barnaheilla - Save the Children á Íslandi í síma 553 5900 eða með því að senda tölvupóst á netfangið barnaheill@barnaheill.is.