Barnaheill - Save the Children

Srey Mab er 13 ára gömul og býr í Veal Bompong þorpi í Kompong Cham sýslu í Kambódíu. Sveitin hennar er mjög afskekkt og þar eru allir bláfátækir. Aðeins eru 10 ár síðan friður komst á í héraðinu, en stríð ríkti í Kambódíu í 30 ár. Mab er nú í 1. bekk og hóf skólagöngu sína í október 2007 þegar skólinn í þorpinu hennar var tilbúinn. Skólinn var byggður fyrir fjármagn frá Barnaheillum, Save the Children, á Íslandi. Með henni í skóla eru 238 börn og flest þeirra voru ekki í skóla áður.

Mab er fulltrúi 37 milljón barna víða um heim sem hafa ekki fengið menntun vegna stríðsátaka og fátæktar. Það kostar aðeins 1.000 kr.á mánuði að veita sérhverju þessara barna gæðamenntun. Hjálpaðu okkur hjá Barnaheillum - Save the Children að bæta framtíð fleiri barna og gefa þeim von og betra líf.  Sjá nánar fréttaþátt Kompásar.

Alþjóðaverkefni Barnaheilla, Save the Children, Bætum framtíð barna (e. Rewrite the Future) sem hófst árið 2006 miðar að því að miðar að því að bæta líf átta milljón barna í 20 stríðshrjáðum löndum fyrir árið 2010 með gæðamenntun. Þetta gera samtökin með því að byggja skóla, þjálfa kennara, búa til námsgögn og virkja stjórnvöld, börn, foreldra og nærsamfélag þeirra. Barnaheill á Íslandi styðja verkefni í Afganistan, Kambódíu og Norður-Úganda.

Í lok ársins 2007 höfðu samtökin náð að bæta menntun meira en fimm milljón barna og í þeim hópi eru tæplega milljón börn sem ekki höfðu áður aðgang að menntun. Alls þurfa samtökin um 450 milljónir Bandaríkjadala (um 40 milljarða IKR) á alþjóðavísu til þessa verkefnis. Barnaheill á Íslandi stefna á að setja um 30 milljónir IKR í menntaverkefnið á árinu 2008.

Alþjóðasamtök Barnaheilla, Save the Children vinna einnig að því að vekja athygli alþjóðasamfélagsins á aðstæðum barna í stríðshrjáðum löndum og nauðsyn þess að setja meira fjármagn í menntun þeirra. Um 37 milljónir barna í stríðshrjáðum löndum eru án menntunar og að menntun barna verði hluti af neyðaraðstoð. Ekki síst vegna þess að í fjölmörgum löndum þar sem átök eru í gangi er miklu fé varið til neyðaraðstoðar svo árum skiptir og því er mikilvægt að neyðaraðstoðin feli í sér skólagöngu fyrir börn.

Alþjóðasamtök Barnaheilla gáfu út á árunum 2007 skýrsluna „Last in Line, Last in School". Þar kemur fram að ríkustu þjóðir heims veita frekar stuðning til menntunar barna í löndum þar sem ríkir stöðugleiki en í löndum þar sem átök ríkja eða hafa ríkt. Áætlað er að árlega þurfi um 990 milljarða IKR (11 milljarðar Bandaríkjadala) til að veita öllum börnum í stríðshrjáðum löndum gæðamenntun. Í skýrslunni kemur fram að aðeins 18% af heildarframlagi 20 ríkustu þjóða heims til menntunar í fátækum löndum fer í menntun barna í stríðshrjáðum löndum, þrátt fyrir að í þeim löndum búi um helmingur þeirra barna í heiminum sem eru án skólagöngu. Þannig eru börn í stríðshrjáðum löndum skilin eftir með litla von um að brjótast úr vítahring fátæktar og átaka. Tölur um menntunarframlög eru byggðar á upplýsingum frá DAC, þróunarsamvinnunefnd OECD. Þar sem Ísland á ekki aðild að DAC, eru ekki upplýsingar um íslensk framlög í skýrslunni. Skýrslan var kynnt alþjóðastofnunum og stjórnvöldum víða um heim, þ.á m. íslenskum stjórnvöldum.