Hátíð trjánna – list í þágu barna, samstarfsverkefni Barnaheilla og listamanna, er nú haldið fjórða árið í röð en með öðru sniði en undanfarin ár vegna aðstæðna í samfélaginu. Listaverk eftir ellefu þjóðþekkta listamenn eru til sýnis og sölu fram í janúarlok 2009 hjá Sævari Karli og Gallerí Fold. Um er að ræða ný og glæsileg verk, bæði skúlptúra og málverk, og tileinka listamennirnir starfi Barnaheilla verk sín. Þema verkanna er tré og af því dregur viðburðurinn nafn sitt. Samstarf Barnaheilla og listamannanna er mikilvæg fjáröflunarleið fyrir samtökin og þakka Barnaheill listamönnunum kærlega fyrir ómetanlegan stuðning.

Til stóð að hafa uppboð á verkunum þann 20. nóvember sl. en var hætt við vegna dræmrar þátttöku. Því var ákveðið að fara þá leið að hafa listaverkin til sýnis hjá Sævari Karli og Galleri Fold og hægt er að bjóða í verkin þar. Einnig er hægt að bjóða í verkin á vefnum www.myndlist.is

Athugið að sum verkanna eru þegar seld.