Fjöldi barna sem ekki stundar nám í Norður-Sýrlandi tvöfaldast vegna heimsfaraldurs

Tvö af hverjum þremur börnum í Norður-Sýrlandi hafa ekki aðgang að menntun.

Átökin í Sýrlandi hafa nú staðið yfir í nærri tíu ár og hafa þau haft gríðarleg áhrif á menntun barna í landinu. En nú í kjölfar heimsfaraldurs fjölgar þeim börnum í landinu sem ekki geta stundað nám. Barnaheill - Save the Children áætla að helmingur þeirra barna, í Norður-Sýrlandi, sem stundaði nám fyrir heimsfaraldur hafi flosnað upp frá námi.

Barnaheill - Save the Children gáfu í dag út nýja skýrslu um stöðu skólabarna í Norður-Sýrlandi en gögnum var aflað með því að tala við 500 kennara ásamt því að ræða við önnur hjálparsamtök á vettvangi. Samkvæmt niðurstöðum skýrslunnar:

  • Er talið að 2,45 milljónir barna - eða eitt af hverjum þremur börnum í Sýrlandi hafi verið utan skóla í lok árs 2019.
  • Vegna heimsfaraldurs hefur helmingur barna í Norður-Sýrlandi sem stundaði nám fyrir faraldurinn flosnað upp frá námi. Afleiðingarnar eru þær að nú eru tvö af hverjum þremur börnum utan skóla.
  • Samkvæmt kennurum hefur 50% nemenda ekki snúið aftur í skólann eftir skólalokanir í mars. Önnur hjálparsamtök á vettvangi hafa sömu sögu að segja og segjast hafa misst samband við helming nemenda sem voru í skóla í byrjun árs.

Þeir 500 kennarar sem svöruðu könnuninni sögðu að aukin fátækt væri stærsta ástæða þess að börn flosnuðu upp úr námi. Það er dýrt fyrir fjölskyldur að senda börnin sín í skóla og hefur fjöldi barna byrjað að vinna til þess að sjá fyrir heimilinu. Vinnuþrælkun barna er alvarlegt áhyggjuefni í Norð-Austur Sýrlandi, en 79% kennara telja helstu ástæðu þess að nemendur hættu í skóla vera þá að börn þyrftu að framfleyta fjölskyldu sinni.

Þegar skólum var lokað í mars þurftu Barnaheill - Save the Children að finna upp nýjar leiðir fyrir skólabörn til þess að þau gætu stundað fjarnám. Stutt var við kennara sem fóru á milli heimila til að aðstoða börn auk fræðslu á netinu og símakennslu þar sem kennarar sendu leiðbeiningar í gegnum smáskilaboð. Þetta hefur verið áskorun en fjöldi barna hefur ekki aðgang að snjallsíma eða interneti sem gerir félagasamtökum og samstarfsaðilum erfitt fyrir að fylgja eftir þeim börnum sem flosna upp frá námi.

Ameen, 12 ára drengur sem býr í flóttamannabúðum í Norð-Vestur Sýrlandi, er einn þeirra barna sem hafa þurft að fá sér vinnu í kjölfar faraldursins til þess að geta séð fyrir systkinum sínum og móður. Hann vinnur á daginn og lærir á kvöldin. ,,Ég hætti í skólanum þegar faraldurinn skall á. Ég vinn við gúrkuræktun. Mánuði eftir að ég hætti í skólanum og byrjaði að vinna gátum við mamma fengið okkur síma. Þannig gat ég haldið áfram í námi og stundað fjarnám. Ég fer í vinnuna á daginn og þegar ég er kominn heim á kvöldin get ég horft á kennsluleiðbeiningar í gegnum símaforritið WhatsApp. Svo geri ég heimavinnuna mína og sendi kennaranum heimalærdóminn í gegnum símann.”

Sonia Khush, viðbragðsstjóri Barnaheilla - Save the Children í Sýrlandi segir að átökin, sem hafa staðið yfir í nærri áratug, hafi hrakið milljónir sýrlenskra fjölskyldna í fátækt. Vegna átakanna hafa börn neyðst til þess að fara að vinna og í kjölfarið hafa þúsundir þeirra flosnað upp úr námi og menntun er orðin að fjarlægum draumi. ,,Save the Children og önnur hjálparsamtök hafa reynt að tryggja að börn hafi aðgang að menntun á meðan heimsfaraldurinn ríður yfir og að börn fái öruggt umhverfi til þess að stunda nám.

Covid-19 hefur aukið enn frekar á þær áskoranir að halda börnum í námi. Við óttumst að þau börn sem hafa flosnað upp úr námi komi aldrei aftur.”

Skýrsla Barnaheilla - Save the Children sem gefin var út í dag ber heitið Reversing Gains. Samtökin hafa miklar áhyggjur af því hvaða áhrif það hefur á börn í Sýrlandi að flosna upp frá námi og hvaða áhrif það mun hafa á framtíð Sýrlands.

Menntakerfið í Sýrlandi þarf sárlega á fjármagni að halda til þess að tryggja að börn í landinu geti haldið áfram í skóla. Samhliða er mikilvægt að koma á áætlunum um hvernig eigi að lyfta fjölskyldum úr fátækt, svo að börn geti haldið áfram í námi í stað þess að þurfa að vinna og vera fyrirvinna heimilisins.

Heillagjafir Barnaheilla eru lóð á vogarskálarnar til að styðja við börn og fjölskyldur þeirra í Sýrlandi. Upplýsingar um Heillagjafir má finna á www.heillagjafir.is.