Engin grá svæði á netinu

Nýlega ákvað Evrópuráðið að helga 18. nóvember ár hvert vernd barna gegn kynferðisofbeldi.  Barnaheill reka Ábendingalínun þar sem tilkynna má um óviðeigandi eða ólöglegt efni á netinu og vilja af því tilefni vekja athygli á alþjóðlegri yfirlýsingu sem nýlega var undirrituð. 

Nýlega ákvað Evrópuráðið að helga 18. nóvember ár hvert vernd barna gegn kynferðisofbeldi. Barnaheill reka Ábendingalínuna þar sem tilkynna má um óviðeigandi eða ólöglegt efni á netinu og vilja af því tilefni vekja athygli á alþjóðlegri yfirlýsingu sem nýlega var undirrituð. Í henni er hvatt til þess að allt efni sem tengist kynferðisofbeldi gegn börnum á netinu verði fordæmt og að ríki setji sér stefnu um að umbera ekkert efni sem sýnir börn á kynferðislegan hátt.

Með yfirlýsingunni er sérstök athygli vakin á myndefni sem víða í heiminum er talið vera á gráu svæði og ekki alls staðar ólöglegt. Á Íslandi er hins vegar allt efni sem sýnir börn á kynferðislegan eða klámfenginn hátt ólöglegt og er framleiðsla, innflutningur, öflun, dreifing og varsla slíks efnis refsiverð. Það er gott að hafa í huga að nektarsjálfsmyndir barna og ungmenna undir 18 ára geta orðið ólöglegar ef þær berast til annarra. Sem dæmi telst sexting, þegar stafræn skilaboð sem eru kynferðislegs eðlis eru send á milli einstaklinga, til alvarlegra mála. Og þó hugmyndin geti virst ungmennum sniðug og spennandi fyrst í stað er hún það yfirleitt ekki. Mjög mörg dæmi eru um að slíkum myndum sé dreift á netið og þær gangi síðan kaupum og sölum. Þannig geta þeir sem missa tök á slíkum myndum af sjálfum sér orðið fyrir kynferðisofbeldi við ítrekaða mynddreifingu einhverra annarra á þeirra eigin myndum.

Þóra Jónsdóttir, fulltrúi Barnaheilla – Save the Children á Íslandi undirritaði samkomulagið fyrir hönd samtakanna í Berlín á dögunum ásamt fulltrúum yfir 30 annara samtaka og stofnana sem vinna að vernd barna gegn kynferðisofbeldi.