Hungur í Sýrlandi - neyðarsöfnun

Ný skýrsla Barnaheilla - Save the Children greinir frá vitnisburði Sýrlendinga að matarskortur sé nú orðinn það mikill að fólk flýi vegna hungurs. Uppskera hefur brostið, ræktarlönd og akrar hafa verið eyðilagðir og stríðsátök hamla dreifingu matvæla í landinu. Sameinuðu þjóðirnar hafa greint frá því að börn hafi látist af næringarskorti og vegna skorts á heilbrigðisþjónustu.

Átökin sem staðið hafa yfir í Sýrlandi í á þriðja ár hafa kostað hundrað þúsund manns lífið, þar af sjö þúsund börn. Ofan á þær hörmungar sem fólkið hefur þurft að líða bætist nú hungur. Uppskera hefur brostið, ræktarlönd og akrar hafa verið eyðilagðir og stríðsátök hamla dreifingu matvæla í landinu. Verð á þeim matvælum sem í boði eru hefur einnig hækkað mjög og nú er svo komið að fólk flýr ekki einungis landið vegna árása, heldur einnig vegna matarskorts.

Þetta kemur fram í nýrri skýrslu alþjóðasamtaka Barnaheilla, Save the Children, Hungur í stríðshrjáðu landi eða Hunger in a War Zone – The Growing Crisis Behind the Syria Conflict. Þar er að finna vitnisburð barna og foreldra sem flúið hafa yfir landamærin. Lífsnauðsynjar á borð við mat, vatn og heilbrigðisþjónustu eru af svo skornum skammti að fólk sér sig knúið til að flýja.

Tala Sýrlendinga sem hafa flúið yfir landamærin er nú tvær milljónir. Samkvæmt upplýsingum frá Sameinuðu þjóðunum eru auk þess fjórar milljónir Sýrlendinga innan landamæranna – þar af helmingur börn – í bráðri matarþörf. Góðgerðarsamtök sem starfa á svæðinu áætla hins vegar að sú tala sé mun hærri og á meðan eyðileggingin heldur áfram, hækka tölurnar. Börn sem gátu treyst á þrjár góðar máltíðir á dag, sofna nú svöng, hrædd og án þess að finnast það skipta alþjóðasamfélagið máli. Sameinuðu þjóðirnar hafa þegar greint frá því að börn hafi látist af næringarskorti og vegna skorts á heilbrigðisþjónustu.

Hjálpum börnunum í Sýrlandi

Barnaheill – Save the Children á Íslandi hafa hrundið af stað neyðarsöfnun til að bregðast við ástandinu og hjálpa sýrlenskum börnum og foreldrum þeirra. Alþjóðasamtökin þrýsta einnig á þjóðarleiðtoga sem sækja allsherjarþing Sameinuðu þjóðanna í New York að finna lausn á ástandinu og greiða aðgang hjálparstarfsmanna inn í landið.

,,Í skýrslunni kalla sýrlensk börn og foreldrar eftir því að stríðsástandinu linni. Þau kalla eftir stuðningi almennings. Vitnisburður þeirra er átakanlegur. Við sem einstaklingar verðum að bregðast við. Ég hvet alla þá sem eru aflögufærir að leggja s&ou