Í hverjum mánuði deyja eða særast 37 jemensk börn

Myndin er af Sameer, átta ára dreng, sem fjallað er um í fréttinni þar sem hann liggur á sjúkrahúsi eftir að hafa orðið fyrir sprengju nærri heimili sínu í október í fyrra. Ljósmynd: Haithm Mohsen / Save the Children.

Á morgun, 26. mars, verða fjögur ár síðan stríð braust út í Jemen. Síðustu tólf mánuði hafa að minnsta kosti 226 jemensk börn látið lífið og 217 slasast í loftárásum Sádi-Araba og bandamanna þeirra. Það eru 37 börn í hverjum einasta mánuði. Sprengjum er varpað á þéttbýla staði, skóla, sjúkrahús og aðra innviði – sprengjum sem erlendar ríkisstjórnir hafa selt Sádum og bandamönnum þeirra. Frá því stríðið braust út hafa verið gerðar 19.000 loftárasir.

Áætlað er að 24 milljónir Jemena séu hjálpar þurfi þar sem ekki er hægt að koma til þeirra mat eða öðrum hjálpargögnum. Milljónir barna eru á barmi hugursneyðar í einum mestu hörmungum okkar tíma. Stríðið og ofbeldið hefur hrakið þrjár milljónir manna frá heimilum sínum, þar af er helmingurinn börn.

Börn sem búa við slíkar hörmungar líða óbærilegar þjáningar bæði líkamlega og andlega. Sameer*, sem er átta ára, er eitt af fórnarlömbum loftárásanna. Hann slasaðist alvarlega þegar árás var gerð á þorp nærri Hodeidah, en hann var á leið heim ásamt afa sínum eftir kvöldbænir. Hann rifjar upp: „Ég heyrði flugskeytið koma, það heyrðist búm, og það leið yfir mig. Pabbi minn hélt á mér í sjúkrabílinn sem keyrði mig á spítalann. Ég vaknaði eftir þrjá daga (…) ég vildi að stríðið myndi hætta, að það myndi allt verða rólegra.“

Sameer slasaðist á höfði og þurfti að fara í aðgerð. Hann er enn lamaður í annarri hendinni. Barnaheill – Save the Children hafa hjálpað honum ásamt öðrum börnum sem hafa slasast í loftárásum með því að greiða læknisþjónustu og lyf og í sumum tilvikum með því að útvega börnum, sem hafa hlotið sálrænan skaða vegna reynslu sinnar, sérfræðiaðstoð. Samtökin hafa einnig komið upp barnvinsamlegum stöðum þangað sem börn geta komið og leikið sér og lært og látið sér líða eins og börn aftur.

Barnaheill – Save the Children hvetja ríkisstjórnir til þess að stöðva vopnasölu til stríðandi fylkinga og að þjóðir beiti sér í Öryggisráði SÞ til að stöðva stríðið eða í það minnsta fylgja eftir friðarsamkomulagi sem náðist í Stokkhólmi í desember sl. Þá þarf að tryggja að neyðar- og mannúðaraðstoð berist til allra þeirra sem á þurfa að halda. Sömuleiðis að tryggja að brot gegn alþjóðalögum sem varða vernd barna og almennra borgara séu rannsökuð og að þeir sem gerast bortlegir verði dregnir til ábyrgðar.

*Nafni hefur verið breytt vegna persónuverndarsjónarmiða.