Fréttir Barnaheilla

Fulltrúar Barnaheilla afhentu Guðlaugi Þór Þórðarsyni utanríkisráðherra áskorun um að stöðva stríð gegn börnum. Jafnframt var biðlað til hans að beita sér fyrir því á alþjóðavettvangi að stöðva stríð gegn börnum og sjá til þess að Ísland verði í fararbroddi í slíkri vinnu.

Yfir 13.000 manns – þar af 5200 börn leita nú skjóls í skólum, tómum rafmagnslausum byggingum og á víðavangi í Al Hasakeh, Tal Tamer og Al Raqqa í Sýrlandi. Í Al Hasakeh-borg þjóna 24 skólar tilgangi bráðabirgðaskýlis fyrir 4160 manns. Ekkert vatn er til staðar í borginni vegna skemmda á vatnsbirgðastöð sem gerir það að verkum að þúsundir manna treysta á að vatn sé keyrt inn í borgina.

Barnaheill – Save the Children vöruðu í dag við yfirvofandi hörmungum í NorðausturSýrlandi, þar sem fjölskyldur og börn hafa nú þegar lagt á flótta frá átökunum. Samtökin auka nú neyðaraðstoð sína á svæðinu sem hefur verið samfleytt í gangi frá árinu 2014.

100 ára afmælisátaki Barnaheilla – Save the Children var hleypt af stokkunum í Smáralind síðastliðna helgi, þar sem tæplega 600 manns „undirrituðu“ á táknrænan hátt yfirlýsingu um að Stöðva Stríð gegn Börnum. Forseti Íslands herra Guðni Th. Jóhannesson og frú Eliza Reid riðu á vaðið með sínu handafari.

Alþjóðasamtök Barnaheilla – Save the Children eru 100 ára á þessu ári. Í tilefni af því blása samtökin til alþjóðlegs afmælisátaks undir yfirskriftinni „Stöðvum stríð gegn börnum“ en aldrei hafa fleiri börn búið á stríðshrjáðum svæðum en síðustu 20 ár.